ilmiy innovatsion

Mahorat darsi

1686 Ko'rilgan ilmiy innovatsion

Mahorat darsi

2019 yil 18 - oktyabr kuni Toshkent davlat iqtisodiyot universitetida mamlakatimizning xorijda faoliyat yuritayotgan taniqli ekspertlaridan biri, “Nordea Bank ABP (Daniya) da katta tahlilchi, byudjet va kontraktlar boʻlim rahbari Sobirov N.T. hamda “Iqtisodiy rivojlanish forumi” koordinatori Abralov M.M. ishtirokida mahorat darsi boʻlib oʻtdi. “Jahon kapital bozorida Oʻzbekistonning tutgan oʻrni”mavzusida tashkil etilgan mahorat darsida universitet professor-oʻqituvchilari, ilmiy tadqiqotchilar va talabalar ishtirok etdi. 

Sobirov Nodirbek Toxirjonovich oʻz maʼruzasida jahon kapital bozorining rivojlanish tendentsiyalari, kapitallashuv darajasi, bozor konʼyukturasi va Oʻzbekistonga investitsiyalar jalb qilishda xorij tajribasidan samarali foydalanishning asosiy yoʻnalishlari haqida oʻz fikr va mulohazalarini bildirib oʻtdi. Shuningdek Sobirov oʻz nutqida kapital bozoriga taʼsir qiluvchi omillarga urgʻu berib ushbu jarayonlarning samaradorligini taʼminlashda sherikchilik kapitaliga eʼtibor qaratish lozimligini aytib oʻtdi.
Ikkinchi maʼruzachi Abralov Maʼruf Maxmudovich “Buyuk kelajak” nodavlat notijorat tashkiloti faoliyati, ekspertlar kengashi tarkibi va amalga oshirilayotgan loyihalar haqida mufassal maʼlumot berdi. U Oʻzbekistonni iqtisodiy jihatdan rivojlanishida xorijdagi kadrlar xizmatidan samarali foydalanilayotganligiga yuqori baho berib kelajakda ushbu jarayonni yanada jadallashtirish choralari koʻrilayotganligini alohida taʼkidlab oʻtdi.

Maʼruzadan soʻng talabalar tomonidan maʼruzachilarga savollar berildi. Savol javoblar bahs munozaralarga aylanib ketdi. Mahorat darsi oxirida bunday tadbirlarni kelajakda doimiy oʻtkazish va maʼruzachilar bilan ilmiy amaliy hamkorlikni saqlab qolish toʻgʻrisida kelishib olindi.

 

- - -